A nova poesía oral galega
A BIBLIOTECA PROVINCIAL DA CORUÑA E AGER INSUFLAN VIDA Á LITERATURA EN TODA A PROVINCIA
A Deputación da Coruña, a través da Biblioteca Provincial, e Asociación Galega de Escritores e Escritoras poñen en marcha "Encontro coas Letras", un proxecto que mestura grandes autores e autoras galegos con escritores e escritoras máis descoñecidos e permitirá á comunidade lectora da provincia da Coruña disfrutar da literatura de forma directa e cercana.
Un autor ou autora amplamente recoñecido polo público, e outro escritor ou escritora de perfil máis descoñecido, fronte a fronte coa comunidade lectora. Esta é a liña argumental de "Encontro coas letras", o proxecto presentado esta mañá pola Deputación da Coruña e AGER, enmarcado dentro do 180 Aniversario da Biblioteca Provincial, que busca dotar dunha vida diferente á literatura nas bibliotecas da provincia da Coruña.
O proxecto, tal e como explica a presidenta de AGER, María Nieto, "servirá para que o público lector, esa comunidade que enche de vida as bibliotecas, coñeza as propostas que os autores e autoras galegos desenvolvemos, dun xeito sinxelo e moi asequible".
Os escritores e escritoras serán emparellados polos seus puntos en común, "é dicir, serán sempre un autor ou autora moi recoñecido e outro ou outra con menos calado público, pero ambos terán sempre algo en común. As súas temáticas, os seus xéneros literarios, a súa xeración literaria, o seu estilo narrativo... Así logramos que a comunidade lectora coñeza propostas novas da man de libros e autores ou autoras que xa lle son coñecidos, e, ao mesmo tempo, impulsamos o debate e a profundización na producción desas plumas xa famosas".
Os "Encontros coas letras" queren ser eventos vivos, nos que a comunidade lectora poida participar activamente para comentar, debater e falar cxs autorxs participantes sen barreiras.
E precisamente por iso o proxecto conlevará 7 encontros en 7 bibliotecas da provincia da Coruña, comezando polo vindeiro xoves 22 de maio ás 19 horas na propia Biblioteca Provincial, que servirá de escenario para o primeiro "Encontro coas Letras", protagonizado polas poetas Lucía Aldao e Branca Trigo Cabaleiro.
Primeiro encontro: Biblioteca Provincial da Deputación da Coruña
- Data: 22 de maio
- Hora: 19h
- Duración 60-75 min.
Autoras participantes do primeiro encontro:
Branca Trigo Cabaleiro (Vigo, 1997) é escritora, regueifeira e editora en Malafera, un selo independente especializado en poesía. É autora dos poemarios Coñecemento do Medo, Condolore e Trans0, ademais dos fanzines Sagrado corazón de Бáба Ягá, Ω e O ser e o nervio. A súa obra baséase na experimentación e mestura da literatura con outras disciplinas como a música ou as artes plásticas. É tamén dinamizadora cultural, organizando o micro aberto de poesía Cerimonia de gaivotas. No pasado mes de abril participou nas Residencias Artísticas de Mariñán, organizadas pola Deputación da Coruña, co proxecto poético Mandrágora, arredor da bruxería e da monstrosidade.
Lucía Aldao (A Coruña, 1982) é poeta, compositora, cantante e dinamizadora cultural. É autora dos poemarios Unha ducia máis un, Todo isto antes era noite e Ninguén morreu de ler poesía. A súa obra está baseada na mestura da poesía coa música e o humor en propostas escénicas. Como dinamizadora cultural é creadora de diversos espectáculos poéticos xunto a María Lado, como Aldaolado, así como o grupo poético Poetas da hostia, un xogo lírico que xunta os poetry slams coa interacción co público. Actualmente lidera a banda PAVA, coa que obtivo o Premio Martín Códax ao mellor proxecto de pop/indie.
Tras este primeiro encontro, e pasado o verán, terán lugar as seis citas restantes, que se repartirán entre setembro e novembro entre diferentes bibliotecas da provincia da Coruña, nun calendario final que será anunciado nunhas semanas.